يوميات ( كحياني )

الاستاذ / كحياني .. ( زعيم مندوبي الماليه والمتحدث الرسمي باسمهم ) ..ذهب الي وزاره الماليه .. وطلب مقابله الوزير ..فوافق سيادته وكانت هذه المقابله ...
الوزير = خير .. سيادتك مين ..وعاوز ايه
كحياني = سيادتك انا / كحياني ( مندوب ماليه ) .. وفيه كام موضوع يخصنا .. طمعانين ناخد رأي سيادتك فيهم
= ماليه ايه .. وطمعانين ايه .. ماتخش في الموضوع ..وتقول انت بتشتغل ايه وتبع وزاره ايه ..وايه اللي حدفك عليا ؟؟
= مانا قلت يافندم ..مندوب ماليه ..يعني قطاع حسابات الحكومه .. تبع وزاره الماليه ..وزاره سيادتك يعني..واللي حدفني هنا ..سيادتك شايف الحاله والعمليه تعبانه ..قلنا نعرض الامر علي سيادتك وربنا يكرمك ويجعله عامر ..وسيادتك سيد العارفين
= يعني سيادتك تبع الوزاره ..طب ياسيدي ..اهلا وسهلا ..معلش اللي مايعرفك يجهللك
= لايافندم ..العفو العفو .. طول عمرنا واخدين علي كده .. مجهولين وماحدش عارفنا
= يعني الشغله والقطاع اللي بتقول عليه ده في الابراج هنا في الوزاره .. يعني سيادتك زميل مش ضيف
=لاياباشا ..زميل ايه .. كده مره واحده ..المقامات محفوظه.. وسيادتك كبيرنا برضه .. والكبير كبير ..وهوه احنا عارفين نبقي زملا ومتساويين بالقطاعات التانيه لما نقول سيادتك زميلنا
=ماشي ياسيدي ..وعلي العموم كل سنه وانت طيب.. الصيام عامل معاك ايه
= لايافندم مافيش اي مشكله ..مناديب الماليه واخدين علي كده .. اصلنا صايمين طول شهور السنه ..بس الفرق في رمضان ان الصيام ( فرض رباني ) ..اما باقي شهور السنه الصيام ( فرض اجباري ) ..والكلام شارح نفسه .. وانا قلت سيادتك سيد العارفين
=اااه ... فهمت .. يعني جاي علشان تقوللي زيادات..ومكافات.. ودفعات..والكلام ده ..زي ماعملتوا مع اللي قبلي ..ااااه .. انا افتكرتكوا .. انتو بتوع المساواه ..والحصانه .. والكلام ده ..روح اقول لزمايلك .. وانا بقوللك اهه اصبروا عليا شويه .. انا لسه بشوف وبتكتك ..ومابحبش حد يستعجلني .. او يضحك عليا
= لا..لا..لا.. يافندم سيادتك فهمتني غلط .. احنا اصلا زهقنا من الكلام في الموضوع ده ..وتجاهل الوزاره زهقنا وجاب لنا ملل من الموضوعات دي ومن نفسنا اصلا .. كل مافي الامر كنا عايزين قعده تعارف وديه ..واستفسار بسيط كده
= طب مادام قعده كده ماجيتش ليه قبل الصيام ..كنا نعمل معاك واجب ... او تيجي علي الفطار اهو ( تطفح ) ..قصدي تفطر معانا
= يافندم انا قلت هاجي علي الفطار..سيادتك هتعيش في دور د/ شرف وتجيبلي فول وطعميه ( زي مابيعزم كل واحد ) ..وهاتحسرني علي نفسي ..وتتحسب عليا عزومه ..والعمليه مش ناقصه الفول ولاالحسره
= طب وكنت عايز تستفسر عن ايه ..خلص يالا علشان انا مستعجل ومش فاضيلك
= هيا والله حاجه تكسف ..بس يالله ..سيادتك مش غريب ..وانت عارف الحاله ..ويادوب الدفعه بتمشي كام يوم وباقي الشهر بقي زي ماسيادتك عارف
=اللهم طولك ياروح ..هانعيد تاني .. خش في الموضوع وخلصنا..
= يعني سيادتك رمضان داخل علي اسبوع اهه ..ولاسمعنا عن افطار جماعي ..ولاموائد رحمن .. ولاحتي كام شنطه كده لرمضان.. كحيانين الماليه كتير ياباشا
= طب ماتقول كده من الاول ..بدل اللف والدوران والصداع ده ..ياسيدي احب اطمنك ..ودي مبادره من زملائك في القطاعات التانيه... انهم لموا من نفسهم مبلغ كده علشان يعملوا ليكوا فطار جماعي ..منها تسدوا بقكوا ..ومنها يتقوا شر عينكو ..علشان مش كل شويه هما بياخدوا وهما بيعملوا ..وتشكروهم وتلموا نفسوكم بقي ...
= يادي الفضايح ..احنا حالنا وصل لكده .. والفرق بينا وبينهم كبر لدرجه اننا نصعب عليهم ويلمولنا ..علي العموم كتر خيرهم ..بس ياريت ماتنساش سيادتك وتبلغنا عن ميعاد الفطار ومكانه علشان الكحيانين يعملوا حسابهم
= وعندي ليك مفاجأه تانيه ياسيدي ( علي الله يطمر فيكو ) ..انا عملت تعزيز لبند العلاقات العامه في الموازنه السنه دي وزودنا بند ( م . ر ) موائد الرحمن يعني ..وكل مديريه هايتنصب قدامها ( الصوان والترابيزات والكراسي ) وكل كحيان فيكو يروح او ياخد عياله ..ويطفح ويفطر وتسدوا بقكو ..ونخلص بقي
= ده عشمنا فيك سيادتك ..والكحيانيين كلهم بيدعولك ..وربن يكرمك وتطول في الوزاره وتقعدلك كده قد شهرين او تلاته بحالهم ..اخر استفسار وهاغور علي طول ..مافيش اخبار عن عيديه السنه دي ..نعمل حسابنا عليها ..ولا الزملا هايلمولنا برضه
=!!!!!!!!!!!!!!!!!!!!!!!!!!!!!​!!!!....صنف نمرود صحيح ..
= مقبوله منك ياباشا ..ويجعله عامر ان شاء الله
******************************​****************************
شخصيه كحياني مستوحاه من كتابات صحفي بالجمهوريه ...ولكن المقال للعبد لله بالاسقاط لشخصيه كحياني علي وزاره الماليه
شكرا للمتابعه...