يوميات كحياني

يوميات كحياني
**********
( كان الوزير قد استدعي كحياني بعدما حدث منه في الفتره الاخيره ومما تسبب له قي احراج بالغ وعتاب من رئيس الوزراء الذي طالب سيادته بضروره استدعاء هذا الكحياني وتوضيح الامر للرأي العام الداخلي والخارجي ..وقد كان الوزير في قمه الغضب مماسمعه من القياده السياسيه... وكان معه مستشاره الذي استدعاه لاخذ رأيه لحين وصول كحياني )
******************
الوزير في مكتبه وفي شده الغضب ...وبجانبه مستشاره...وهنا دخل كحياني
=انت فين يازفت ..من الصبح بنتصل بيك وانت مش موجود.... كنت فين داهيه
= في الصوان ياباشا..ماسيادتك عارف لازم اتابع كل حاجه بنفسي ..الصوان .. والاكل ..والحلل ..و.....
=الله يخرب بيتك ..الدنيا مولعه علينا وانت تقولي صوان وحلل ..الهي ينصبوا صوان علي روحك ياشيخ انت والقطاع بتاعك ده وربنا يريحنا منكوا..ده واضح فعلا زي ماسياده المستشار كان بيقول ...قطاع مافيش من وراه غير وجع القلب ..وموظفينه زي سيادتك اهوه سايب شغلك ولامنتظم فيه ..وقاعدلي جنب الصوان والحلل
=الله ..الله ..هوه فيه ايه ياباشا ..انا جاي وفاكر سيادتك عاوز تعرف وتتابع تنفيذ قرار سيادتك بتاع الموائد ..والحمد لله العمل علي قدم وساق تنفيذا لقرار سيادتك ..لكن سيادتك فاجأتني ..هوه ايه اللي حصل مني ..ومين اللي واقف جنب سيادتك ده..وايه الهجوم المفاجيء علي القطاع ده ياباشا ..وقصه مش منتظمين دي كمان ..هوه المستشار الجديد لحق ..علي طول قال لسيادتك نفس الكلمتين البايخين اللي المستشارين مش حافظين غيرهم ويقولوهم لكل وزير ييجي ..الحضور ةالانصراف ومابيروحوش كل يوم وطلباتهم كتير و و و ....ياباشا لازم سيادتك تعرف ان دي ناس ماورهاش غير المشاكل وعاوزيين سيادتك طول عمرك باصص بس ومركز علي قطاعين تلاته والباقي اللي هوه احنا مهملين لانهم عارفين اننا اقوي منهم ولو حد نصفنا وقدرنا هانكشفهم علي طول ونكشف ارقامهم وانجازاتهم الوهميه اللي هما عارفين ومتأكدين ان قطاعنا ورجالاتنا هما السبب فيه ..علشان كده بضربونا في ضهرنا ولما نطلب طلب عادل فيه حقنا يتقلب ونبقي بنعمل مشاكل وو..
=بس..بس..خلاص انت اماصدقت ..احنا في ايه ولافي ايه ..ماتنتظم ولاتروح ولاماتروحش .انشالله تولع بجاز حتي ...احنا عايزين نحل المشكله والمصيبه اللي انت عملتها دي وشوهت صوره الوزاره ..وقالوا الوزاره فيها انتحاريين وارهابيين وثوريين وانكوا في وزاره مش لاقيين تاكلوا...عاجبك يعني الفضايح دي كلها
= وانا مالي ياباشا ..انا قلت للناس تخترع القصص دي كلها ..ياباشا الفرحه بقرار الموائد بتاع سعادتك ماخلتنيش داري بالدنيا ومن فرحتي ماحسيتش بالوقت ..وماكلتيش يومين تلاته علشان ماملاش بطني واكون جاهز لما لذ وطاب ...لكن الجوع كافر ياباشا فجالي هبوط وانرميت الرميه اللي عملت المشكله دي ..انا ذنبي ايه بقي
= ذنبك انك مسروع علي بطنك وهمك كله تملي بقك ..وانك تبع وزاره كبيره ..كان لازم تشغل دماغك وتستني لما الحاجه تجهز بدل مافضحتنا كده ...
=مش قد فضيحتي ياباشا ..وفضيحه ( كحيون )
= نعم ياخويا .. ايه كحيون ده كمان ..اوعي تكون عملت مصيبه تاني واحنا مش عارفيين
= لاياباشا ..( كحيون ) ده ابني الكبير ..بكالوريوس تجاره ..ومستني اقدمله في الوزاره ..في نفس القطاع ..
= احنا ناقصينك ..لما هاتجيبلنا ابنك كمان ..دي نصيبه ايه السوده دب..
= يابلشا ده مش ليا ده للاجيال الجايه ( مبدأ تأصيل الكحيانيه في الحسابات الحكوميه )
= وبسلامته اتفضح ازاي ان شاء الله ..
= الواد بعد ماسمع الاخبار وان ابوه ثوري ..وانتحاري ..وزعيم ...وقعد في المنطقه يتمنظر ويتفاخر بأبوه ..عرف الحقيقه ان العبد لله ابوه طب ساكت من جوعه وكحيانته ..لاثوره ولازعامه ولايحزنون..في فضيحه للواد وليا اكتر من كده ياباشا ..
=اهو ده اللي احنا عاوزين نوضحه ..وجيبتك هنا علشان كده ..تشرح للناس الحقيقه ونفضها سيره بقي ..شوف هاتعمل ده ازاي وقولي رأيك
= الموضوع بسيط ياباشا ..سيادتك تدعوا لمؤتمر صحفي عالمي ونوضح فيه الامر بكل شفافيه ..وانا تحت امرك ياباشا ..واهو ابقي اتفضحت داخليا وخارجيا ..مش مشكله وانا فداك ياباشا
= طيب انا هاشوف المستشاريين ويظبطولنا المؤتمر .....
= لاياباشا سيبني انا هاتكتك وهاعملك مؤتمر يحكي عنه العالم ..
*******
وغدا ان شاء الله يبدأ كحياني في الاعداد للمؤتمر الصحفي ونحضر جميعا معه المؤتمر....