يوميات كحياني

واكحيناه ...واكحيناه ..
كده برده ..علي طول نسيتني ..سايبني مرمي
الفيران او الفراخ هاتكلني ..
اخص عليك ..ده انا رمزك ..يعني بقيت منك ..
جايلك نوم ..بالذمه مش حاسس ومكسوف من نفسك ..
انا غلطان اني مثلتك ..كنت شفت راجل قادر يحافظ عليا ..وعاوز تتحمل مسئوليه ناس ودايره وقطاع ..بلاش خيبه ..اختشي علي دمك ..وفوق ..وفوق ..
اصحي من نومك ياكحياني ..اصحي ..اصحي ...
واكحيناااااااااااااااااااااااه .......
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
( اعوذ بالله من الشيطان الرجيم ) ...بسم الله ..بسم الله ..
هكذا قام كحياني من النوم مذعورا من هذا الكابوس ..الذي رأه في نومه ..بسبب الحاله النفسيه السيئه التي يعيش فيها منذ سرقه ( قفص العيش الناشف ) ..رمزه الانتخابي ..
....ام العيال كانت نايمه جنبه ..وقامت علي صوته ..
= بسم الله ..خير ياكحياني ..خير ياخويا ..في ايه!!!
= كابوس ..وكابوس فظيع كمان ..القفص كان بيناديني !!!
= قفص بيناديك !!! لا..الف سلامه عليك وعلي القفص ..مانا قلت مش هاينوبنا من الترشيح وقصه الترشيح دي غير الجنان ...خلصنا من المال العام ..طلع لنا قفص المجلس
= ياوليه القفص شكله في ازمه ..وده معناه في التفسير للاحلام اني انا اللي هاكون في ازمه ..وسرقه الرمز هتأثر سلبيا علي برنامجي الانتخابي ..الناس مش هاتثق اني هحافظ علي طلباتهم واصواتهم ..فهمتي بقي ..
= اللهي اعدم القفص ..ان كنت فاهمه حاجه ..ياراجل بطل تخاريف ..واستهدي بالله كده ..واتغطي كويس ونام ....
= انام !!!! ..وانا هايجيلي نوم بعد اللي القفص قالهولي ..ده انا كده ابقي قليل الاصل فعلا ..لاني بلغت وخلاص ..وماكلفتش نفسي اسال ولااتابع التحقيقات وصلت لفين ..
= خلاص كده ..بكره ان شاء الله تروح وتسأل وتتأكد ..وتتطمن علي القفص ..ادينا حلينا المشكله ..سمي الله ونام والصبح يحلها حلال ...
= الصبح ..هوه لسه بدري علي الصبح ..اه لو اصحي الاقي القفص نايم جنبي ....
= القفص نايم جنبك !!!! طب خلي ليلتك تعدي ..واتخمد بقي ..
= خخخخخخخخخخخخخ
= صبرنا يارب !!!!!!!!!!!!!!!!!!!!!!!