يوميات ( كحياني )

الاستاذ/ كحياني ( زعيم مندوبي الماليه والمتحدث الرسمي باسمهم ) ..وبناءا علي ماتم من لقاؤه بالامس مع سياده وزير الماليه ..ومفاجأه السيد الوزير ( لكحيانين الماليه ) من تعزيز بند العلاقات العامه لعمل موائد الرحمن لكل الكحيانين في المديريات الماليه ..ووعد سيادته بعمل صوان امام كل مديريه ماليه لمائده الرحمن ...وقد اصيب ( كحياني ) بخيبه امل ..واحباط شديدين ..حيث توجه الي مقر مديريته ولم يجد الصوان ..ولا المائده ..فقرر ان يتصل بالوزير ليظهر له غضبه وليستوضح الامر ..
= الو.. الو ...مين معايا
= انا / كحياني ..كنت مع معاليك امبارح
= كحياني مين ..وزفت مين ..فكرني كنا بنقول ايه ..وعايز ايه
= كحياني ياباشا ..بتاع موائد الرحمن ..ولما قلت لس...
= بس خلاص افتكرت ..واحنا مش خلصنا وقلتلك روح وهاتفطح في الصوان قدام مديريتك
= والله يافندم من امبارح وانا بحلم بالصوان واللي هايكون علي الترابيزات في الصوان ..وللجديه في الامر سيادتك ..ام العيال اما صدقت ..وحتي طبق الفول اللي كانت بتعمله كل يوم نفطر بيه ماعملتوش ..عشمانه في كرم سيادتك ....المشكله ان انا سيادتك واقف قدام المديريه من العصر ( لزوم الحجز والتظبيط ) ..ماكانش فيه اي مظهر لاي حاجه ..ولحد المغرب سيادتك لكان فيه مائده رحمن ولاصوان ولاطبليه حتي ...وبرضه مافقدتش الامل واستنيت للعشا ..مافيش فايده ..ولاحياه لمن تنادي ..يرضي سيادتك كده ؟؟ البهدله وقله القيمه ؟؟
= يادي الفضايح ..وعاملي مندوب ماليه وعارف القوانين ..انا قايلك انه هايتم زياده البند وتعزيزه بفرع جديد في شجره البيانات وهو بند ( م . ر ) ..ده هايكون من غير قرار وزاري علشان ده تعديل في ابواب الموازنه ( وعاملي شاطر في شغلك ) ..وبعدين قرار بتشكيل مائده الرحمن ..وباقي الاجراءات بقي ياكحياني ..وزي مانت شايف هي غلطتك ..انت اتعشمت وروحت مسروع علي الاكل ..وده سبب الصدمه ..يعني انا ماليش دعوه ..وانا برضه مش هاسيبك جعان كده ..وتعال اهو ناكل لقمه مع بعض ( ويبقي عيش وملح )
= يادي النصيبه علي المثل ده هوه ماينفعش كباب وكفته ..سمك وجمبري ..فراخ ورومي ...ياساتر لازم عيش وملح ..الظاهر اللي قاله كان كحياني نيله
= ياكحياني مش كده ..اي لقمه وهي ( بصله المحب خروف )
= يااااه .. ده علي كده الواحد بياكل خروف كل يوم ..ده البصل عندنا قرب يكون من الفاكهه ..وعلي العموم ياباشا متشكرين لسيادتك وياريت شويه استعجال من سيادتك للقرار والكتاب الدوري ..وانا كده كده مستني في الشارع كل يوم في الفطار ..ياروح صوان المديريه ..ياأي حته تانيه ويجعله عامر بحسك ان شاء الله ..
=مع السلامه ياكحياني ..وانا لو رايح في اي عزومه هابلغك واهو تتشبك معايا ( علي الله يطمر فيك ) ...